…啊！沉实而害怕的男叫声，我的。
…哗屌！做乜尻？广东话粗口，小巴司机的。
我们三人没有怠慢，亳不犹豫的从地上站起来，退开…
SHIT！我到这时候才发觉到，流动病床下，那堆乱成一团遭的纸张及医疗器具旁，竟躺着个人！
…那人忽地从所在位置站了起来，除了震撼了那病床外，还震撼了我们三人的弱小心灵。
一个瘦弱的男子，慢慢从床底爬出。
非常瘦削，满头金发。
…你？我诧异问道。
…你…你地…他搔了搔头，同样诧异。
白粉男？
…屌…屌你老母，乜你仲未死咩？一如既往，小巴司机是第一个作出反应的人。
虽然我对这问题也很感兴趣，可比起这，我还有更重要的事情要问他…
我平静下来，尝试调控着那受到惊吓，疯狂飙升着的心跳，喘气道：
…你…你点解唔听电话…？…我…打过好多次电话比你…点解无听既？你呢几日去捻咗边度？
听到我们的问题，白粉男先是愣了下，眼神飘忽的看了我们各自一眼；然后他吐了口气，慢条斯理地提起了右手，往自己脸颊上摸了下，道：
你老尾，个仆街『胎记仔』真系无呃我；……你地…终于都黎喇？
episode 35
另一边厢
仆街，要讲真系唔知系边度讲起好…明明出事开始到宜家，三日都未够，个感觉就已经好似过左三年咁。
以前成日听人讲，山中方七日，世上已千年，唔知系咪就系呢个意思…
嗄？唔系啊？哦…个意思唔同啊？是鬼旦啦…宜家又唔系写小说，啲成语执得咁靓都无捻用啦！
由边度讲起好呢？小巴落车开始？
无…果日落车都未有咩发生住，我因为有啲急事，同你地分开之后都好快返左屋企…
首先我要澄清一点，我果日落车时同你地讲，我住广福里楼上；但其实，我根本唔系住广福里，我其实住仁兴街…即系广福桥隔黎，火车博物馆果度…
做咩一提广福桥你就弹左弹？做咩事…？
我唔系有心呃你地，但我同你地三唔识七，只不过搭左同一架小巴番大埔，点解要讲咁多野你地知喎…
我住仁兴街啲洗车房上面既旧楼，系啊，都住左好耐架喇…我果日落左小巴之后，有啲急事，所以咪快快趣同你地讲byebye，即刻返回家先啰。
咩急事？唉你地唔捻好理啦！
总次我同你地分别左之后，就快快趣返左屋企训！我一开始都好似司机你咁，以为鬼掩眼，谂住返去冲个凉，一教醒返就无事…屌，点捻知唔系！
我训啊训，一路训到第日黄昏先起身；我谂果时都成4,5点喇，个天都慢慢黑紧…
我训左咁耐真系好肚饿，所以果时我训到成身大汗，系比自己饿醒既！
我拿拿林落街，谂住搵野食。点知出面乜都珊哂，咩都落哂闸无开。我本来好钟意广福道果度，有间鱼蛋粉好正架！趁啲人唔见哂，我咪谂住去食个免费餐啰。
点知啲人好衰唔衰，岩岩就系凌晨2点几先全部消失哂，搞到果时啲铺头已经落哂闸，除左广福道间M记，就咩都珊哂…真系食捻屎。
果时我企系广福道，个天岩岩黑紧，顶，明明啲路灯啊，红绿灯啊果啲仲着紧，但就咩人都无哂，剩返我一个企系路中心，个FEEL都咪话唔惊！
我有试过去间鱼蛋粉度睇下，试下开唔开到佢个锁，谂住可以爆格入去食都好啊…顶佢个肺，点知佢个锁咁捻难开，无工具系手都真系开唔到…唯有死死地气，都系去左对面M记果拎野食啦。
我不嬲都唔食M记既。愈黎愈贵，但系啲野又好似屎一样咁难食…真系啊，佢果啲咁既所谓加大码餐，其实除左个银码加大左之外，个分量根本就无加大过。
但无办法啦，好肚饿，咁我咪求只入去拎左两个汉堡包，又拎左小小薯条，回家食啰。
…咩话？讲咩话？
入，正，题？屌，我咪讲紧入正题啰仆街！
我返左屋企，谂住开个电视一路食一路睇。
点知开左个电视，台台都系雪花！无捻野啊！原来个世界无哂人真系唔得，连电视都无得睇！
我快快趣食完，突然间又有少少急事，咪谂住出一出去攞啲野，返黎先再训啰！果时应该就9点几10点到…
…急事咪急事啰！问咁多做咩啫！
顶，讲你地都唔明啦！
我真系好急，所以食完野，睇左一阵雪花电视就已经顶唔顺，落左街，谂住去个攞货既地方，睇下有无剩货系度…
！
屌，仆街。
系啊，攞货啊！明啦，唔洗我画公仔画出肠啊嘛？
仆你个街啊，我唔小心讲漏口啫，唔哂追住黎问啊？系啊…粉啊，海洛英，四号仔，“软野”…你钟意点样叫就点样叫啦…
得啦，你地无人当差架喇？
其实我第一日落车果时，身上啲货已经chur得七七八八，但又真系好顶瘾，所以咪急急脚回家，谂住啪返两枝吗啡，顶住瘾先…喂，皱咩眉头啫，无办法啦…条瘾起系上黎，我都唔想架！
我落左车既第一晚，返去已经啪左两野吗啡…哗，之后好训到呢…所以一起身咪已经第二日既夜晚啰…
讲番呢度先…之后我食完饭，抖左阵，仆佢个街，条瘾又起喎！我不嬲chur开软野既，吗啡其实真是不是我果范，我都系无野系身，先将就住既啫。
瘾起，可以点啫，咪出街睇下有无货啰！
全世界既人唔见左，唔代表连全世界既货都唔见埋架嘛！无拆家系度阻头阻势，有免费货拎，屌，咁咪仲好！发达啦今铺！
大埔呢带既软野，一向都系大麻辉睇既…系啊，佢个名叫大麻辉，但其实佢负责睇粉！
大麻辉系大中（大埔中心）度，不嬲有个档，专放粉…佢好high架，好似做戏咁，将啲粉放哂系个公园度，佢就坐系公园门口，你入去时比钱，佢就会话你听包粉放系边，之后你就要自己入去掘，就算当场比差佬断正，佢都可以话唔识你，自己甩到身啊嘛…呢啲咪醒啰！
平时去个公园拎货都要交入场费，今次连个收费人都唔系度，就好似入迪斯尼个secure唔见左咁，顶，仲唔拿拿声入去玩多转！
嗄？咩公园？咪八号花园隔离果个…叫咩啊…唉…
啊！我知喇…
大埔旧墟公园！
？
又做咩啊？讲广福桥你又咁，讲旧墟公园你又咁…？
果时天都已经黑哂，我急急脚由广福桥过河，直接系汀角路入口，跑左入去个旧墟公园度…
我地呢啲帮衬开既，当然知道大麻辉啲货会放系边啦！佢黎黎去去都系放果几个地方…唔系坑渠底，就埋系棵树下面！所以我咪即刻跑去游乐场隔离个坑渠底度，check下有无啰…
点知我连续揭开左几个坑渠盖，入面咩都无！系啊，个坑渠入面，除左坑渠水就真系咩都无！仆佢个街，我点会估到大麻辉连临消失之前，都要带走哂佢啲货先消失架！好心唔好咁自捻私喇！屌。
我唔服气啊，所以咪又跑左去棵树下面，睇下会唔会仲有货埋左系度！
果时夜晚，你地知旧墟公园入面啲灯光又好暗架啦…我坐系草丛入面既一棵树底，双手系咁掘系咁掘，谂住会唔会有机会掘到粉…
掘到成手都系泥，只手比地下d野参到成手损哂，点捻知连半包粉都搵唔到，仆佢个街。
就系呢个时候，我听到啲声…
仆街，真系谂番都心寒。
我听到有人系度讲野！
唔系一个…唔系两个…而系…顶，我谂至少有成十几个人系度讲紧野…
叽叽咕咕叽叽咕咕叽叽咕咕叽叽咕咕…
就好似，有成班人系度窃窃私语，咬紧耳仔！
我果时篱埋左系棵树后面，第一反应都好似你地咁，寒左一寒，但随即又谂…会唔会系救兵呢？
谂到呢度，我就继续训系个地度，好似人地啲海陆陆战队咁，沿住块地慢慢向前爬，谂住睇下究竟系咩人…
我一路爬一路爬，啲人声就愈来愈大声，愈来愈清楚…
叽叽咕咕叽叽咕咕…叽叽咕咕叽叽咕咕…
系啊，佢地真系讲紧野！不过我一句都听唔明…
因为佢地讲紧日文！
呢个时候，我已经爬到去个山坡边缘，再向前爬，就已经系行人路，我停左落黎，向行人路望过去…
我见到佢地！
大概有十四、五个着住黑色西装既人，企左系条行人路中心度！
最恐怖系…佢地块面全部都带左个黑色既防毒面具！
系啊，真系好捻恐怖！